شرح كروت الاصناف الخاصة ببرنامج فارما فلاى

==== ندخل بقى فى الشغل المهم ====

* برنامج الاصناف *

** طب ازاى تفتحه ** عن طريق الكيبورد دوس على  Control + I يعنى تثبت صبعك على زرارCtrl ودوس على حرف ال I  مرة واحدة وبعد كده سيب الزراير  --- لو كنت من عشاق الماوس اللى انا مش بحبهم  افتح قائمة الاصناف فوق خالص اعلى البرنامج  واختار برنامج تعريف الاصناف

برنامج الاصناف فى فارما فلاى

يطلعلك علطول البرنامج الحلو  ده  بص على الصورة كده وحاول تقرا كل اللى مكتوب فيها ونكمل كلامنا بعد الصورة

برنامج الاصناف

طيب -- نتعرف بقى عليه
زى ما تقول كده ده  اهم جزء داخل البرنامج ويعتبر العمود الفقرى بتاع البرنامج  لانه فيه كل كروت الاصناف باساميها ومعلوماتها  يعنى باختصار ده السجل المدنى بتاع الاصناف اللى ممكن تفتحة علشان تغير سعر صنف او تضيف صنف جديد فى لسه نازل السوق او تمسح صنف وحاجات كتير اوى تانيه
حميل .........  اوك  نتعرف بقى على الزراير بتاعته
لاحظ ان كل زرار مكتوب عليه الامر والاختصار بتاع الكيبورد   وبراحتك  خالص

تعديل : علشان تفتح كارت صنف موجود بالفعل فى قاعدة بيانات البرنامج سواء كان الصنف له رصيد او لا لأننا ملناش دعوه الان بالارصده بتاعة الاصناف احنا بنعدل فى الصنف نفسه وبياناته الاساسية زى السعر والمورد وخلافه

جديد : علشان  نسجل على البرنامج صنف جديد  ماكنش موجود قبل كده  يعنى  صنف  لسه جديد فى السوق ( وما اكتر الاصناف )

حذف : بعيد عنك دى اللى بيمسح الاصناف من القاعدة بتاعة البيانات

بحث : علشان تدور على الصنف بالاسم والسعر أو صنف جاى فى روشته وخط الدكتور نبش فراخ أو زبون جاى مش عارف هو عايز ايه

100 100 

تعالو بقى  نخش على  تعديل الاول .......  اوك   المفروض دلوقتى انك  فاتح برنامج الاصناف زى الصورة اللى فوق
-- لو دوست على تعديل على طول مش هيفتح حاجة علشان انت محددتش  صنف البرنامج يعدله
طيب  اكتب علطول الصنف اللى ان أنت عايزه  ومش عايزك تدوس على بحث  اكتب على طول ومالكش دعوه  الصنف هيظهر امامك علطول بعد ثالث حرف او رابع حرف زى الصورة دى   ( الحروف اللى كتبتها اهه ادامك ZAN  والاصناف تحت برده )

البحث عن صنف

كل صنف امامه سعرة والكميه اللى عندك فى الصيدليه 
مثلا زانتاك 150 عندك علبتين وشريط
وزانتاك 25 عندك  علبه  وثلاث امبولات  ---------- فل؟
الحركة اللى جايه بقة ازاى  نعدل فى بايانات  صنف 
اختار الصنف اللى عايز تعدل فيه الاول بالماوس او الاسهم  وبعدين دوس تعديل
انا اخترت زانتاك 300

تعالوا نشوف كارتته

بيانات الاصناف

بص يا  دكتور او بصى يا دكتورة  متفتحوش أى حاجة غير اللى انا بشرحه بس اوك !!
ممكن نتعرف  ( قصدى على الكارته )

الجزء الاول من الكارتة :::::: مواصفاات عامة

اسم الصنف :  شايفينه فى الصوره اكيد اسمه بالكامل وده مهم جدا انه يكون كامل علشان كل الناس تفهم هو ايه....  اصل فيه ناس بتكتبه ناقص  ومش بيبقى مفهوم  لو لقيت  اسم مش مظبوط  معلش ابقى صلحة من عندك .. يعنى الاسم لازم يبقى شامل التركيز وعدد الحبيات او الكبسولات أو الامبولات ولو الصنف Ret نكتب  ولو SR نكتب ولو أطفال نكتب ولو كبار نكتب يعنى نلم فى اسم الصنف كل المعلومات اللى تميزه عن صنف تانى لان الشركة المصنعه ساعات تعمل من نفس الصنف عبوتين مختلفتين فى الحجم زى Cataflam  يبقى كل حجم له الكارته بتاعته ( نفسى الشعب المصرى يشتغل بضمير ساعتها هنحكم العالم )

فئة التصنيف : ودى الفئات اللى الكمبيوتر بيعرف منها ان الصنف ده تحت انه تصنيف يعنى حبوب ولا شرب ولا  حقن لان الكمبيوتر مش هيفهم من اسم الصنف حاجة  ( لو كتبناله اسم الصنف (ام على) مش هيرفض )  وممكن تغير فئة التصنيف لو لقيتها غلط  امسح الرقم اللى جنب التصنيف ودوس على زرار Enter  على الكيبورد  يطلعلك  لستة التصنيفات اختار منها المناسب

المورد : أه ه ه    يعنى الشركة صاحبة الصنف -- الشركة اللى صنعته -  مش الشركة اللى بشترى منها الصنف .... والشركات المصنعة زى   امون -  جلاكسو - العامرية  مش فارما والمتحده  ولو اتزنقنا ومش لاقين للصنف شركة ممكن نحط المورد اى شركة موزعة
والشركة اللى بنشترى منها هنبقى نكتبها ان شاء الله فى فواتير المشتريات بعدين سيبك من ها دلوقتى
ولو مزاجك تغير المورد برده نفس الطريقه امسح رقمه ودوس Enter  تطلعلك كروت الموردين نقى اللى يعجبك
اصل الكارته دى زى شهادة الميلاد بيتكتب فيها محل الميلاد مش بيتكتب فيها انا ساكن فين دلوقتى 

 --- المهم --- 

الوحدات بالعبوة : بس نقف هنا شويه علشان فى كلام مهم عايز اقوله  بس يا ريت يوصل
بص -- العبوة : هى علبة الصنف
وفى العلب الكبيرة زى  Bruffen 200   او ريفو  او  نيوكاربوترينا  او  سبازمو  العبوة هنا  هى الشريط ذات نفسة لان الشركة كانت المفروض تعمل كل شريط فى علبه ( بس كبرت دمغها )
 الوحدات  بالعبوة يعنى العبوة فيها  كام  شريط  او فيها كام حباية ( برطمان مثلا )
طيب ناخد مثال  Ketofan 25   الوحدات بالعبوة 2 علشان فيه شريطين  ولكن  Ketofan 50  الوحدات بالعبوة 20 علشان ده بتقص وبيتباع فرط
يعنى احنا ممكن نلعب فى الوحدات بالعبوة زى ماحنا عاوزين
طيب مثال تانى  Fawar Fawakeh  قيه علبه فيها 6 اكياس  دى تعتبر عبوه  بها 6 وحدات بالعبوه  ولكن  فوار الفواكه ال 60 كيس  يعتبر الكيس الواحد  اللى بربع جنيه عبوة كاملة علشان احنا بنبيع قطاعى  وفاركو عاملاه كده علشان يتباع بالكيس
وهكذا فى الامبولات وغيره وعايزك تتفرج على كل الكارتات دى  وتفهم  الموضوع  على فكرة ممكن  تدوس على زرار خروج  علشان  تخرج من كارتة صنف  وبعدين  تنظف اللسته اللى امامك فى برنامج الاصناف  لو دوست على  BackSpace على الكيبورد
طيب احنا لسه فى كارتة الزنتاك 300  بنشرح فيها

طباعة ملصقات : لو متعلم عليها  - علامة صح -  يعنى الصنف ده لما تدخله رصيد فى فاتورة مشتريات  الطابعة هتبقى  تطبعلك  لواصق  تلزقها  عليه  ولو مش متعلم  صح يبقى مش هينطبعلو  على حسب مزاجك  ( من الاصناف اللى مش بيطبعلها  ريفو  كيتوفان 50  - السرنجات - امبولات الميه -..... ) يعنى الاصنام اللى مش شرط نطبعلها لان ممكن منطبقش عليها تاريخ الصلاحية لانها سريعة البيع

وهبقى اوريكو تتباع ازاى بسهولة من غير الباركود
وكله توفير ( وربنا العالم بأحوال الصيادلة فى بلدنا )

تطبيق تاريخ الصلاحية : لو برده متعلم علامة صح عليها يعنى الصنف ده ليه صلاحية  وممكن بعض الاصناف يكون ليها تاريخ صلاحية  وبرده  نشيل العلامة علشان الاصناف دى ماتستاهلش  يتعملها تاريخ  زى ( الريفو - الكيتوفان - البرفانات ) او الاصناف اللى بنجبها كتير وبتخلص بسرعة

سعر البيع : هو سعر بيع العلبة كامله

ما عدا  العلب الكبيره او زى ما قلنا قبل كده    هنا  يبقى سعر البيع هو سعر بيع الشريط لان الشريط هنا يعتبر عبوة كامله زى السيدوفاج الشرايط الوحدات بالعبوة بتاعته 1 وسعر البيع 1.25
وممكن الشريط ده اللى احنا بنعتبره عبوة  تكون الوحدات بتاعة العبوه بتاعته على عدد حباياته لأنة بيتباع  فرط زى الريفو
وبعدين هنبقى نشرح ازاى نبيع بالشريط  او الحباية بكل سهولة

نسبة الخصم :  بتاعة الحكومة  يعنى  20  او 12 للمستورد  ( نسب الخصم التانيه بتاعة ال SubAgent  هتتكتب فى فواتير المشتريات

فاهم وعارف اللى فى دماغكم
وهكذا -- الاضافى  -- والضريبة  ------ سعر التكلفة بيتحسب لوحده من الارقام اللى فاتت كلها
تمام يا دكاتره ؟؟؟؟؟؟   لو حبيت تعدل بقى سعر البيع ابقى عدله واعمل حفظ
نسيبنا بقى من  تعديل  ونشوف حاجة تانيه وهى

 جديد ::::  اللى بنعمل منها صنف جديد

برده من برنامج تعريف الاصناف ندوس جديد هتطلعلك الصفحة اللى مافيهاش بايانات زى  دى  كده
بس نصيحة غالية قبل مل تلمس زرار جديد اتأكد ان الصنف مش موجود على البرنامج يعنى دور عليه كويس علشان فيه كارثة بتحصل فى الصيدليات الناس بتدخل الصنف كذا مره يعنى صنف زى E-mox فيه ناس بتكتبه Emox طبعا مش هتلاقيه كده ويروحو متسرعين ومدخلينه صنف جديد ونندم بعد كده وصنف زى R.B.G  (المرجع فى اسم الصنف علبة الصنف نشوف الصنف مكتوب عليها ازاى ) خلى بلكم من العلامات

تابع بيانات الاصناف

خليك صاحى معايا خطوه خطوه
1- اكتب اسم الصنف كامل على هذه الصور كامثله
ZANTAC 300MG 20T
يعنى الاول الاسم  ولو فيه RET  او  SR  اكتب   وبعدين التركيز  ولو مافيش تركيز  طنش  وفى الاشربه اكتب التركيز  و حجم العبوه 165مل ولا 90مل طبعا بالانجليزى
وبعد كده تكتب الوصف    Like : 20T or 30T or 5AMP or  SYP , SUSP , OINT , CREA   يعنى الاختصارات تتكتب  بنتظام  علشان انا بحب الترتيب وبكره الشغل المصرى
...........  على فكرة الشركات ساعات تعمل من نفس الصنف علبة شريطين وعلبه شريط  يبقة ده ليه كارت لواحده والتانى ليه كارت لواحده  وكمان كده فى الاشربه بالنسبه لاحجامها  ( الكلام ده خطير )
2- بعد ما كتبت اسم الصنف تدوس Enter تلاقى نفسك فى فئة التصنيف  دوس Enter تانى واختار فئة وبعدين دوس كمان Enter وكمان Enter واختار شركة وهكذا السعر والباقى  وبعد ما تخلص الموضوع دوس حفظ وكده يكون الصنف دخل فى الخدمة ومبروك وعقبال بقيت الاصناف الجديده
كده خلصنا جديد ........ 

مسح :::: علشان تحذف الصنف من قاعدة البيانات  اساسا اكتب الصنف اللى انت عايز تمسحه فى برنامج تعريف الاصناف زى ما اتعلمنا قبل كده واختار الصنف اللى عايز تمسحة ودوس مسح  ( بعض الاصناف مش هتتمسح علشان تم التعامل عليها قبل كده لو انك  بعتها او اشتريتها  )

اخر حاجة بقى علشان نخرج من البرنامج ده بقى  ----  زرار بحث ----
بحث :::::: الزرار ده بقى معمول للى مش بيعرف حاجة فى اى حاجة  يعنى لا بيعرف انجليزى ولا ادوية ولا عربى ولا صيدله اساسا 
كيف :-
**** ممكن تدوس بحث  وتكتب فى خانة الاسم  الحروف دى  ZAN  وانزل سهم لتحت واكتب فى خانة السعر 30  ودوس على Enter
تلاقى لسته اصاف نقى منها ودوس Enter

بحث عن صنف

*** ممكن حاجة افرس من كده  تعرف تقرا الصنف ده اللى انا كاتبه ده  xantak   اكتبه كده زى ما هو غلط فى البحث ودوس Enter  وشوف النتيجة
او اكتب  apemul  او  Kuram  أو  qetuvan  أو refo  او  ظيسطريل  -- حتى بالعربى هيصححلك  ويجبلك بالانجليزى ( اى خدمة )  وهى دى متعة التكنولوجيا -- اكتب اللى فى نفسك  ما يهمكش p  او b       أو حتى    x  أو  z  كله شغال بفضل  ربنا كله هيظهر وماتفكرش الكلمة دى بـI ولا بـ e

تمام تمام

*** الاشد بقى  ان يجيلك صنف فى روشته وخد الدكتور زبالة اصل الدكاتره البشريين بيحبوا يتعوجوا على الصيادلة وده حال المصريين
ازاى  طبعا  دوس على بحث فى  برنامج تعريف الاصناف  وهناخد مثال مع بعض
مره واحد جه الصيدلية ومعاه روشته كان فيها صنف كان مكتوب شخبط شخابيط وكان باين فيه بعض حروف والحروف التانية غير واضحة
الصنف كان مكتوب كده  

نلا حظ ان الحروف الواضحة هى  ga -do- n
'اوكى  : افتح بحث واكتب ga  بعدين اكتب علامة %  عن طريق الضغط على  Shift + 5  على الكيبورد  ثم اكتب  do وعلامة % ثم n
على الصورة دى   ga%do%n  ودوس  Enter  وشوف الشغل
وهكذا للبحث على

  ZITHROMAX  اكتب ---->  %ROMAX

  ROWATINEX  اكتب ---->  %NYX       price  8  فى خانة السعر

عيش  حياتك
**** حاجة اجمل من كده  : زبون دخل مش عارف هو عايز ايه  بيقولك  عايز الكبسولات  ام  11.5   بس
بسيطة  اكتب فى بحث فى خانة السعر11.5 
وفى خانة التصنيف اختارTablet + Capsules
وافتكس  انت بقى اختراعات جديده عندك الحروف  وعلامة %  وجرب

الجزء الثانى من الكارتة ::::: نواقص وباركود

وهناخد الجزء ده معانه علشان ممكن نحتاجة لما نكود الاصناف .... وادى الصورة

تابع بيانات الاصناف

الباركود الدولى : وده الباركود اللى موجود على علبة الصنف اللى الشركة طبعاه  ويهمنا اننا نضيفة فى الكارته علشان ممكن نستخدمه فى الاصناف اللى مش ناويين نطبعلها باركود او الاصناف سريعة البيع اللى بنجبها بكميات كبيره طيب

بعد ما ندخل صنف جديد نبقى نضيف الباركود الدولى على كارته الصنف 

طيب ازاى نضيف الباركود ده

دوس على زرار اضافة اللى موجود تحت كلمة الباركود الدولى وبعدين عدى الصنف على جهاز الباركود سكانر تلاقيه يسجل الرقم علطول

ملحوظة :::: صنف مثلا زى صابون FA  ال 50 جرام  الشركة عاملة 100 لون ونوع  وكل نوع الباركود الدولى بتاعة غير النوع التانى احنا ممكن نعمل كارته واحدة اسمها FA soap 50gm  ونضيف كل الباركودات الدولية بتاعة كل الانواع داخل الكارته دى ونريح نفسنا من كترة الكرتات

كده تمام برنامج الاصناف  وهنبقى نرجعله تانى علشان نكملة بس كل حاجة بأوان

شكر خاص للمهندس محمد أسماعيل