شرح فواتير المشتريات ببرنامج فارما فلاى لادارة الصيدليات

 فواتير المشتريات

هنشرح فى الدرس ده بقى الشغل الجامد --- فواتير المشتريات  اللى محتاجة ناس مركزة وغاوية تكنولوجيا وبصراحة لو مش غاوى تبقى دقيق متركبش كمبيوتر
فيه ناس بتفتكر ان الموضوع صعب وان الواحد هيدخل اسامى كتير وارقام وبلاوى لاااااااااااااااااااااااا
متخافش الموضوع كله عبارة عن شكة دبوس ركز بس فى الدرس ده وانت تبقى   100    100
***** زى كل مرة يا ناس  نفتح فاتورة المشتريات منين
عارفين طبعا ...... وانا برده هتعب نفسى واحطلكم الصورة   ( ولاحظ ان جنب كل امر الاختصار بتاعه على الكيبورد )

فواتير المشتريات

ماتتخضش لما تلاقى الشاشة دى

شكل فاتورة المشتريات فى برنامج فارما فلاى

--- امامك  دلوقتى فاتورة المشتريات وفيها اربع زراير تحت ( جديد - بحث - بحقيبة الملصقات - خروج )
توكلنا على الله :::: ندخل فاتورة جديدة ازاى ؟؟؟؟؟؟

الخطوة الاولى  :- ندوس على جديد بالماوس  او ندوس على زرار Enter  باعتبار ان العلامة جاهزة على زرار جديد

الخطوة الثانية :- البرنامج هيرد عليك برسالة جاوب عليها والرسالة اهيه

نوع فواتير المشتريات على برنامج فارما فلاى

يعنى البرنامج بيسالك الفاتورة اللى انت ناوى تدخلها دى بحساب نسبة الخصم ( يعنى فاتورة ادوية ) ولا بحساب سعر التكلفة ( يعنى فاتورة مستلزمات )
بحساب نسبة الخصم  : الفاتورة هتسال على نسبة الخصم اللى على الصنف
بحساب سعر التكلفة : الفاتورة هتسال على السعر اللى انت اشتريت بيه الصنف ( سعر الصيدلى )
-- اختار اجابة ودوس Enter --- ونكمل

الخطوة الثالثة :- المفروض الفاتورة مستنياك تكتب رقمها ( ورقم الفاتورة اكيد هو اللى مكتوب على القاتورة الورق اللى فى ايدك )

بعدين تدوس Enter علشان تنقل على خانة التاريخ - تلاقى البرنامج كتبلك تاريخ النهارده لوحده لو الفاتورة بايته من امبارح خلاص اكتب انت تاريخ امبارح بس يكون على الصورة دى  Like This   : 01/05/2007  ولاحظ ازاى بنكتب اليوم والشهر لازم تحط صفر قبل الشهور اللى قبل اكتوبر وكذلك الايام  --  ولو خلصت التاريخ -- دوس  Enter  تبقى فى خانة المورد  لو حافظ رقمه اكتبه ودوس Enter   لو انت مش من الناس الصميمة دوس Enter  من غير ما تكتب الرقم هتطلعلك كارتة الموردين اختار منها اللى على كيفك وبعدين تدوس  Enter تانى  .....

الخطوة الرابعة :- انت دلوقتى واقف فى خانة الكود وطبعا مش معقول هتحفظ اكواد الاصناف .... طيب ....

-- دوس  Enter ومتزعلش منى انا لغاية دلوقتى مش مخليك تدوس الا على Enter
وبعدين اكتب 3 حروف من اى صنف كده زى مانا كاتب  واكتب كمان سعر الجمهور ودوس Enter   ( اخر مرة)

-- ليه بقى بنكتب سعر الجمهور !!!!  اول حاجة علشان البحث يجيب الصنف بسرعة وتانى حاجة علشان ديما اتاكد ان الاسعار اللى جايه النهاردة فى الفواتير مطابقة للى فى البرنامج علشان ممكن تكون حاجة سعرها اتغير وانا مش واخد بالى  ( التغيير من اجل مستقبل افضل )
ممكن بقى نشتغل بطريقة تانية بدل ما تدوي Enter  وتكتب 3 حروف وسعر الجمهور ....... اننا نعدى الباركود الدولى على جهاز الباركود سكانر بس خلى بالك خلى بالك خلى بالك اتاكد من السعر والاسم اللى نزل فى الفاتورة احتمال يكون سعر قديم وانت مش واخد بالك ولو الصنف ماعلهوش باركود دولى يبقى نشتغل بالطريقة بتاعتنا

الخطوة الخامسة : بعد ما الصنف بينزل فى الفاتورة  تلاقى المؤشر واقف فى خانة الكمية مستنيك تكتب الكمية ( خلاص اكتب الكمية اللى اشترتها ) ودوس  Enter   تلاقيه نط تانى فى خانة تاريخ الصلاحية ( اكتب التاريخ على الصورة دى  Like This : 10/2007  شهر وسنة بس  ودوس  Enter  يروح رايح على السطر اللى بعده علشان الصنف اللى بعده وطبعا هتدوس Enter  متنساش !!!!!!!

طيب :::: اكيد بتدور فى دماغك اسئلة كتير هاجوبلك عليها دلوقتى بس بعد ما تشوف الفاتورة دى بعد ما كتبنا فيها

فهم مفاتيح فواتير المشتريات

أول سؤال : لو فارما اوفر سيز  بعتت مثلا صنف 4 علب علبتين بتاريخ وعلبتين بتاريخ تانى ادخلهم ازاى ؟؟الاجابة :- بسيطة هدخل الصنف على سطرين اول سطر هدخله عادى زى ما شرحنا فى الخطوة اللى فاتت والسطر التانى وانا واقف على خانة الكود بتاعته ادوس على ( + )  الاقى الصنف اتكرر علطول واكمل الكمية والتاريخ  ( حتى انا معلملك عليه بسهم احمر اهه فى الصورة اللى فاتت )

تانى سؤال : لو الفاتورة مكتوب فيها 10 علب توبلكسيل  وببص فى الكيس  لقيت تسعة بس او لقيت واحدة مكسورة او انا عايز ارجعها على الفاتورة ؟؟ الاجابة : بسيطة هندخل الكمية اللى انا هخدها بس فى الفاتورة والكمية اللى هرجعها على الفاتورة هدخلها فى سطر لوحدها -- بالطريق اللى فى اجابة السؤال اللى فات  -- وبعدين وانا واقف تحت الصنف اللى هرجعه  ندوس ( - ) هيسالك سؤال جاوب عليه  حتى انا برده معلملك عليه سهم احمر فى الصورة اللى فاتت ...  علشان الفاتورة دى لما تحفظ  تبقة وفاتورة واشعار مرتجع وحساباتك تبقى مظبوطة

كمان سؤال : طب لو انا اكتشفت ان اول صنف دخلته فى الفاتورة العدد بتاعه غلط يعنى مش علبتين دول  4 علب  ؟؟؟ الاجابة : سهلة اطلع سهم لفوق وانت فى خانة الكود  لغاية ما توصل للصنف ودوس  Enter  تلاقى نفسك فى خانة الكمية غير على كيفك
مممممممممم

ممكن سؤال : لو اكتشفت انى دخلت صنف غلط وعايز اشيله من الفاتورة واحط الصنف الصح مكانه ؟؟؟؟ الاجابة : ممكن لو طلعت لغاية كود الصنف ده ومسحت الكود بتاعه ودوست على  Enter  تطلعلك خانة البحث اكتب فيها الصنف الصح واتعامل مع الموقف

اخر سؤال : لو انا عايز امسح صنف من فاتورة  ازاى؟ الاجابة : عيب بقى ما فيش حاجة اسمها تمسح صنف من فاتورة ( لاسباب امنية ) لكن ممكن تسيب الصنف زى ما هو وتسيب كميته صفر وتحط اى تاريخ ومش  هيعمل مشكلة

ملحوظة : بعض اسماء الاصناف مكتوبة باللغة العربية مثل ( سرنجة 3 سم - أقراص خميرة - أبو فاس - كانيولا - قياس ضغط - قياس سكر - الخ ..)
*****  خلصت كل الاسئلة ؟؟؟؟؟؟؟؟؟
طيب خد بقى الحتت دى علشان اخلص ذمتى
اول حته :
لو مثلا زنتاك 300 الشركة زودت سعره من 30 الى 31  وانا ماكنش عندى خبر وفاتح فاتورة مشتريات وعمال اكتب 3 حروف وسعر الجمهور وعايش حياتى فى الفاتورة  وفجاة  كتبت Zan  وفى خانة  السعر  31 ولا واخد بالى  خالص  وادوس Enter ( مافيش مش عايز يجيب حاجة )
اااااااااااااااااااااااااااااااه
حاجة من ثلاثة اما الاسم اللى انا كاتبه غلط او السعر اللى انا كاتبه  غلط  او  يكون الصنف ده اصلا صنف  جديد
الحل للمشكلة دى : امسح السعر وابحث بالاسم بس -- هتلاقى الصنف بس بالسعر القديم ولا يهمك انزل بيه فى الفاتورة  ##### طيب
نغير سعره ازاى ؟؟؟؟ فاكرين  ولا ناسيين؟؟؟ ----   من برنامج تعريف  الاصناف  بتاع الدرس الثالث  .....  طيب انا هسهل الموضوع عليكم
بعد ما نزلت بالصنف فى الفاتورة بالسعر القديم وانت  واقف اهه على خانة الكمية وقبل ما تكتب الكمية  دوس على حرف ( I ) معلملك عليه بسهم احمر فى الصورة اللى فاتت... يفتحلك الكارته بتاعة الصنف ده علطول غير فيها السعر ودوس  حفظ ولما ترجع للفاتورة دوس على زرار Home  على الكيبورد وبعدين دوس على  Enter تلاقى الوضع اتظبط
تانى حته :
لو عايز تفتح الاعمدة بتاعت الاجزاء ( الشرايط يعنى ) او الخصم الاساسى او الاضافى او البونص فى الفاتورة   .... هتعمل ايه ؟
بص .... اضغط  بالماوس مرة واحدة على الكلمة ذات نفسها تلاقى نجمة صغيرة اوى ظهرت جنب الكلمة وده معناه ان العمود ده مفتوح  وهتعدى عليه لما تكون بتدخل بيانات الصنف كاملة
الخطوة الاخيرة : لو خلصت الفاتورة خلاص  دوس على زرار  Finish  وده تلاقية تحت خالص فى فاتورة المشتريات اللى امامك
بعد ما تدوس على Finish  البرنامج يطلب منك ( إجمالى قيمة الفاتورة ) يعنى الفلوس اللى هتدفعها فى الفاتورة او بمعنى اصح القيمة اجل او نقدى او بشيك على حسب وضعك فى نوع الدفع
ملحوظة ::: بعض الصيدليات بتطنش ومش بتكتب نسب الخصم داخل الفاتورة ولا بتكت ضرايب اللى بيهمهم بس الكمية والتاريخ لكن لما بيجوا يقفلوا الفاتورة بيكتبوا الرقن اللى هيدفعوه مظبوط  بغض النظر عن القيمة اللى الفاتورة جمعتها . ( يعنى احنا نحب نريح جميع الاطراف )
--- المهم  اكتب الرقم اللى تحبه ودوس حفظ لو عايز تحفظ الفاتورة او عدم الحفظ لو حبيت تلغى الفاتورة او رجوع لو حبيت ترجع للفاتورة تكون نسيت تكتب فيها حاجة او غيره
بعد ما تدوس حفظ البرنامج يسالك عايز ترسل الاصناف دى لحقيبة اللواصق
وحقيبة اللوصق دى مكان بتجمع فيه اللواصق اللى انت ناوى تطبعها لغاية ما يجيلك مزاج تطبعها
-- لو جوبت نعم : يبقى هيبعت الاصناف دى الحقيبة
-- لو جاوبت No : يبقى انت ناوى تطبع دلوقتى
أما ازاى نطبع اللواصق -- بأذن الله فى  الدرس اللى جاى  وعليكم خير
جميل أوى :::::: ندخل بقى على النوع التانى من الفواتير ( فاكرين ) اللى بحساب سعر التكلفة فقط يعنى لا خصم  ولا ضرايب ولا وجع قلب
طيب : لما تدوس جديد فى فاتورة المشتريات وتلاقى المنظر ده

اختيار بحساب سعر التكلفة

اختار بحساب سعر التكلفة لكل صنف الاختلاف مش كبير بينها وبين اللى شرحناه قبل كده  حتى شوف

شكل فواتير حساب التكلفة

ولما تخلص الفاتورة وتحفظها بالطريقة المعتادة ممكن البرنامج يسالك شوية اسألة ذى دى

هتجاوب ب  yes  وده علشان كارتة الصنف ده كان مختار فيها انه يتعامل بنسبة الخصم لكن احنا خلاص هنعاملة بسعر التكلفة على اساس انه صنف  مستلزمات
**** بعد ما توافق على كل الاصناف  البرنامج هيسالك السؤال ده

تعديل سعر البيع بفواتير المشتريات

اضغط علىحفظ التعديلات على اسعار البيع  فقط  لان الاختيار التانى تعديل سعر البيع محدش بيستخدمة لانه بيزود سعر البيع او يقلله على حسب سعر التكلفة اللى اشترينا بيه الاصناف

فكل اللى هنعمله نحفظ التعديل فى سعر التكلفة مع الحفاظ على سعر الجمهور ثابت

أخر حاجة هنتكلم عليها وننتهى بقى

البحث عن فاتورة مشتريات

دخلناها قبل كده وعايزين نفتحها لاى سبب ( نعدل فى الاصناف بتاعتها - نطبق لواصق الاصناف بتاعتها - نغير المورد ) براحتنا خالص

طيب :::: لما تدوس Ctrl + P علشان نفتح الفاتورة بتاعة المشتريات تلاقى زرار اسمة بحث دوس عليه تلاقى البرنامج مستنيك تكتبله رقم الفاتورة اللى ناوى تفتحها ولو مش فاكر الرقم دوس Enter  اكتب التاريخ ولو مش عارف التاريخ دوس Enter واكتب رقم المورد  ولو لقيت نفسك فقدت الذاكرة ومش فاكر حاجة بسيطة لو دست Enter وطلعتلك لستة الموردين دوس Escape تلاقى لستة بكل الفواتير اللى دخلت على البرنامج من زمان واكيد اخر فاتورة او اللى قبلها هى اللى عليها العين اختار الفاتورة اللى تعجبك ودوس برده Enter ولما تفتح الفاتورة دوس تعديل وبعدين Enter  كام مره كده لغاية ما توصل للصنف اللى انت عايزه.

شكر خاص للمهندس محمد أسماعيل