شرح تقارير (النواقص-انتهاء الصلاحية - الرواكد ) ببرنامج فارما فلاى

 التقارير ( النواقص - انتهاء الصلاحية - الرواكد )

 التقرير الأول : تقرير النواقص

نواقص الصيدلية شئ متعب جدا خصوصا فى مصر لاسباب كتيرة منها ( قلة خبرة بعض العملين فى الصيدلية - كثرة البدائل - عدم ترتيب الصيدلية - عدم معرفة العاملين بالصيدلية بمعدل بيع الاصناف -الخ .......)
ولو حبينا نريح نفسنا ونخلى البرنامج هو اللى يدرس الموضوع  ويبلغنى اشترى ايه وكام  من غير ما اتدخل واحدد لكل صنف حد للطلب ووجع القلب فى 4000 صنف  بيتغير معدل بيع 1500 صنف منهم تقريبا على مدار السنة
احنا بقى الحمد لله اخترعنا تقرير النواقص الاوتوماتيك

نحاول الأول نعرف هو بيشتغل ازاى وبعدين نشرحة  GO

نتخيل اننا عينا شخص فى الصيدلية كل شغلته يقعد على باب الصيدلية وكل زبون خارج من الصيدلية يروح الراجل ده اخد منه الكيس وشايف فيه ايه ويكتب عنده الاصناف اللى اتباعت  يعنى الراجل ده بيراقب المبيعات ( بيعد علينا يعنى ) وعلى اعتبار ان الشخص ده بقالة شهر او اتنين او اكتر شغال على ده الحال
جميل؟؟؟؟؟
الراجل ده لو سألته وقلتله انا عندى علبتين Amaryl 1gm  على الرف اشترى عليهم كام علبة علشان أأمن نفسى شهر جاى  يروح الراجل عامل حساباته ويقولة جيب 8 علب  واروح اسألة على صنف تانى برده عندى منه علبتين يروح يقلى هات واحدة كفاية .... عارفين ليه لان الراجل ده عارف معدل بيع كل صنف خلال الفترة اللى فاتت واللى انا بحددها سواء شهر او شهرين او احسن فتره اللى هى 6 أشهر وبعد ما بيدرس معدل البيع يرجع يشوف الرصيد اللى عندى حاليا فى الصيدلية لكل الاصناف ... لو حس ان فيه صنف رصيده ميكفنيش  15 يوم جاييين ( وبرده الرقم ده انا اللى بتحكم فيه ) يقوم يطلب كميه تكفينى شهر جاى او اكتر على حسب ما أنا محدد .

ودى قصة  رجل النواقص

طيب :: تعالو نفتح تقرير النواقص ونعرف بنظبط ارقامة ازاى  ونعيش فيه
من قايمة تقارير نضغط على تقرير النواقص  ( والقايمة فى الصورة اللى جاية -  التقرير بعدها )

يفتح

زى ما انتم شايقين  فيه زرار اسمة خيارات تقرير النواقص نفتحه ونشوف

هنا نقابل 3 أرقام  ومن خلال الـ 3 أرقام دول البرنامج هيجيب النواقص للصيدلية كلها
أول رقم  :  يهمنا ان الرقم ده يزيد وده عدد الايام اللى فاتت اللى البرنامج بيشوف معدل بيع الاصناف فيها  يعنى شهر او شهرين او 6 شهور وده افضل رقم
            فكل شهر يعدى علينا نزود الرقم  لغاية ما يوصل 180 يوم (6 أشهر)
الرقم التانى : بعد ما البرنامج بيدرس معدل بيع الاصناف خلال الفترة اللى فاتت  (الرقم الاول ) يرجع يشوف رصيد الاصناف اللى عندى حاليا فى الصيدلية  ولو لقى صنف رصيده ميكفنيش 15 يوم  جايين  يطلب منه كميه  تغطينى لمدة ( 30 يوم )  اللى هو الرقم الثالث 
جميل جدا .....
يعنى ممكن نلعب فى الارقام براحتنا
يعنى ممن نخلى الرقم الثانى 30 والرقم الثالث 60 لو بنحب نطلب كميات كبيرة فى المشتريات  المهم ان الرقم الاول يزيد علشان البرنامج بيحب يدرس فترة طويلة فاتت علشان يبقى عنده فكرة كويسة عن معدل بيع الاصناف ودى الطريقة الاوتماتيكى
تمام ... بعد ما نظبط الارقام  وندوس حفظ نرجع تانى  لخيارات تقرير النواقص

الاختيار الاول - لكل الشركات المورده : يعنى لكل الشركات اللى بنشترى منها الادوية سواء مصنعين أو موزعين
وبعدين ندوس على اظهار النواقص نلاقى المنظر ده

المفروض ان دى الاصناف اللى ناقصة واللى الصيدلية محتاجاها
كل صنف امامه الكمية المطلوبة والموجود ومتوسط البيع والمورد الاساسى وفى الاخر اسم اخر مورد تم شراء الصنف منه
طيب ازاى نطلب
لو انا مع شركة موردة على التليفون مثلا كل صنف نطلبة نعلم عليه فى خانة ( ط ) يعنى اطلب وبعدين ندوس على زرار (تحويل الى أمر شراء) يقوم البرنامج يفتح شاشة الموردين ونختار منها المورد اللى طلبت منه الاصناف وتلاقى شاشة النواقص  بقت بالشكل ده لما نفتحها تانى

امام كل صنف ملحوظة انه طلب من شركة كذا ولملا تيجى الطلبية  وندخل الارصدة الاصناف دى هتتشال لوحدها من النواقص زى ما دخلت لوحدها
ودى كانت النواقص لكل الشركات المورده
الاختيار الثانى - لشركة معينة : نفس شكل التقرير ولكن لشركة وحدة فقط زى ( أمون - فايزر - فاركو ) يعنى لشركة مصنعة  وفى التقرير ده البرنامج بيجيب كل الاصناف اللى بتصنعها الشركة دى سواء اللى ناقصة فى الصيدلية او غيرها
الاختيار الثالث - حقيبة شركة : ودى ظريفة اوى  ... لما بنفتح تقرير النواقص لكل الشركات الموردة فيه بعض الاصناف مستورده أو بيكون موردها شخص واحد فقط فى البلد مورد شنطة فانا بختار الاصناف دى وبدل ما احولها الى امر شراء احولها لحقيبة مورد علشان تظهر بعد كده فى حقيبة المورد ده فقط دون غيره وكده ابقى سهلت على نفسى لما يزورنى المورد ده افتح النواقص واختار حقيبة شركة وادوس اظهار النواقص لقيت اصناف اطلبها منه مالقتش اسلم عليه واخليه يرحل
الاختيار الرابع - النواقص العامة : ودى الاصناف اللى مش متوفرة فى السوق لاى سبب فبدل ما تزحملى الدنيا فى تقرير النواقص العادى ابعتها فى النواقص العامة .... فلما بنفتح تقرير النواقص لكل الشركات  نعلم على كل الاصناف الغير متوفرة فى السوق على المربعات اللى فى اقصى اليسار وبعدين ندوس خروج من التقرير ولما نبقى نختار النواقص العامة بعد كده هنلاقى الاصناف دى هناك
الاختيار الأخير - مع أختيار فئة التصنيف : الاختيار ده بيشتغل مع كل الاختيارات السابقة وده علشان نجيب نواقص الاقراص لوحدها بس او نواقص الاشربة لوحدها او غيره  فبنختار التصنيف اللى انا عايزه واطلب براحتى
وبكده نكون عرفنا ازاى نطلب النواقص
سؤال : بعض الاصناف انا عايز احددلها حد للطلب بنفسى مش عايزها تشتغل اتوماتيك  - - - منين؟؟
الاجابة : فاكر برنامج تعريف الاصناف بتاع زمان - بتاع كارتة الصنف  - - - افتح كارتة الصنف  واختار (نواقص وباركود) تلاقى 3 خانات زى دول اللى متعلم عليهم بالاحمر

حد الطلب : يعنى الصنف يظهر فى النواقص لما يوصل كام علبة فى الصيدلية
أقصى حد للمخزون : وان البرنامج طلب الصنف ما يطلبش ازيد من كام
حجم كل طلب : او البرنامج لو طلب الصنف يطلب كام بالتحديد يعنى ممكن نكتب فى حد الطلب 10 ونكتب فى حجم كل طلب 20 فكل ما الصنف يبقى رصيده 10 البرنامج يطلب 20 بغض النظر عن معدل البيع او ممكن نكتب فقط فى خانة حد الطلب ونسيب البرنامج يطل لواحده براحته
يعنى باختصار بنكتب فى الخانة الاولى والثانيه  أو  الخانة الاولى والثالثة  وكده نكون سيطرنا على الصنف

التقرير الثانى : تقرير إنتهاء الصلاحية

من هنا

التقرير ده

فيه كل الاصناف اللى ليها تاريخ صلاحية داخل الصيدلية كل صنف امامه سعره وصلاحيته والرصيد وبيانات أخرى
وقبل ما نشرح التقرير ... اى تقرير ممكن نفتحة ممكن نرتب اعمدته زى ماحنا عايزين عن طريق الضغط على اسم العمود اللى فوق فى اول العمود
ندخل بقى فى شرح التقرير
سؤال : انا عايز اطلع بس جميع الصلاحيات بتاعة 10-2010  ؟؟؟؟
الاجابة : الزرارير اللى على يمين التقرير -  دوس علىAdvanced Filterتظهر الاختيارات دى

اول حاجة نختار العمود اللى هفلتر بيه من Select Column وبعدين اختار العملية من Operation وبعدين نكتب القيمة اللى هفلتر بيها فى خانة Valueوندوس اظهار النتائج
يعنى لو اختارنا (الصلاحية الفعلية ) وبعدين (=)  وبعدين كتبنا10/2010التقرير هظهر بس الاصناف اللى تايخ صلاحيتها 10-2010
وممكن نختار ( < )  يعنى أكبر من 10-2010
أو ( =>)يعنى اصغر من او تساوى 10-2010
اوFrom  تاريخ 10-2010  الى 12-2010
وبنفس الطريقة ممكن نفلتر التقرير عن طريق سعر البيع  أو عدد العبوات
طيب ::: نرجع لزراير التقرير تانى
Restore : وده بيرجع التقرير زى ما كان قبل الفلتره

Cell include : وده لأنتقاء خلية بعينها ... بمعنى اوضح علم على اى خلية من خلايا جدول تقرير انتهاء الصلاحيه سواء الخلية دى مكتوب فيها تاريخ او سعر او عدد ودوس على Cell Include يروح البرنامج لاغى كل القيم وسايب كل القيم اللى شبه القيمة اللى كنت مختارها (جرب بنفسك)

Cell Exclude : عكس Cell Include يعنى بتستبعد كل القيم اللى شه القيمة اللى اخترناها  ( فلتره على السريع يعنى )

Delete Column : لحذف اى عمود مؤقتا من التقرير بغرض طباعة الاعمدة المهمة فقط والاستغناء عن الباقى

Total : قيمة سعر البيع للأصناف اللى بالتقرير

To Excel  : لإرسال التقرير الى برنامج  Microsoft Excel  لطباعة التقرير بشكل أخر او التعديل فيه خارج حدود برنامج PharmaFly

Print :  لطباعة التقرير على ورق
سؤال :بعض الاصناف مش بترجع لشركاتها الا قبل تاريخ انتهاء صلاحيتها بـ 6 أشهر نعمل فيها ايه ؟؟؟
الاجابة : نفتح كارتة الصنف ده من برنامج الاصناف  ونختار (نواقص وباركود) وبعدين نلاقى خانة تحت مكتوب جنبها (إظهار هذا الصنف بتقرير انتهاء الصلاحية قبل تاريخة بكام شهر؟) نكتب فى الخانة رقم 6

طيب:::  نبقى نعرف ازاى ؟؟؟؟
بسيطة : نعتبر مثلا ان Procamil ده تاريخ صلاحيته الفعلى 12-2010 والمفروض انه يرجع للشركة فى تاريخ 06-2010 خلاص يبقى صلاحيته الافتراضية 06-2010 - جميل -
فلما نفتح تقرير انتهاء الصلاحية كل شهر وندوس على Advanced Filterنخنار الصلاحية الافتراضية  ثم =  ثم06-2010 وساعتها نلاقى كل الاصناف اللى تارخها 06-2010 طلعت ومعاهم ال Procamil اللى تاريخه الفعلى 12-2010

التقرير الثالث : أصناف لم تباع منذ ...... ؟

او بمسمى أخر تقرير الرواكد
وده بيدينا الاصناف الراكد اللى مش بتتباع من وقت انا اللى بحدده
فلما نفتح التقرير من قايمة التقارير

البرنامج يسأل

نكتب العدد بالايام وندوس موافق يظهر تقرير فيه الاصناف الميته